Ӗнер ЧР транспорт министрӗн ҫумне ӗҫрен кӑларнӑ. Хушӑва премьер-министр Сергей Артамонов алӑ пуснӑ.
Ӑна мӗншӗн ӗҫрен кӑларни пирки официаллӑ майпа каламан. «Чеб.ру» даннӑйӗ тӑрӑх, премьер-министр «Пехет» агромаркета аталантарас тесе Шупашкарти хӑш-пӗр транспорта «Каскад» суту-илӳ центрӗ урлӑ ярассине сӳтсе явнӑ. Анчах калаҫу ҫыхӑнман, Арлашкин кун пеккипе ҫыхланма килӗшмен имӗш. Кун хыҫҫӑн ӑна ӗҫрен кӑларнӑ та. «Ҫумпа пӗрле министерствӑн тӗп ӗҫченӗсен пӗр пайӗ ӗҫрен кайма хатӗрленет», - тесе ҫырать «Чеб.ру».
«Провинцивиль» телеграм-канал хыпарланӑ тӑрӑх, Юрий Арлашкин «Пехет» агромаркета аталантарс енӗпе ӗҫлес темен. Кун пирки вӑл Сергей Артамонова тӳррӗн каланӑ имӗш. Лешӗ вара ҫав кунах ӗҫрен кайма заявлени ҫырма хушнӑ, Элтепер те хирӗҫ пулман.
Палӑртмалла: Юрий Арлашкин министр ҫумӗнче 2020 ҫулхи ҫу уйӑхӗнченпе ӗҫленӗ.
Шупашкар хулин пуҫлӑхӗн ҫумӗсене ҫирӗплетнӗ. Архитектура тата градостроительство енӗпе Яков Михайлов ҫине тӑрӗ, социаллӑ ыйтусемшӗн Людмила Маркова яваплӑ пулӗ. Кун пирки Шупашкар хулин пуҫлӑхӗн тивӗҫне пурнӑҫлакан Станислав Трофимов ӗнерхи планеркӑра пӗлтернӗ.
Яков Михайлов хулари Калинин районӗн администрацийӗн пуҫлӑхӗнче 11 ҫул тӑрӑшнӑ. Людмила Маркова вара хула администрацийӗнче культура тата туризма аталантарас енӗпе ӗҫлекен управление 2013 ҫултанпа ертсе пынӑ.
Чӑваш наци телерадиокомпанийӗ валли тинех директор тупнӑ. Ку должноҫе Татьяна Молокова йышӑннӑ. Хушӑва паян республика премьерӗ Сергей Артамонов алӑ пуснӑ.
Татьяна Кирилловна – 51 ҫулта. Вӑл И.Н.Ульянов ячӗллӗ ЧПУн филологи факультетне пӗтернӗ. Журналист карьерине 1996 ҫулта «Чувашское агентство сообщений» ЗАОра пуҫланӑ. Кайран «Вырӑнти телевиденире», «Канал 5 плюсра», «Советская Чувашия» хаҫатра ӗҫленӗ. Чӑваш наци телерадиокомпанийӗнче 2012 ҫултанпа ӗҫлет.
Сӑмах май, НТРКн ҫулталӑк ҫурӑ ӗнтӗ директор пулман. Унччен ку должноҫре Алексей Гурьянов ӗҫленӗ. Халӗ вӑл – цифра аталанӑвӗн министрӗн ҫумӗ.
Республикӑри пӗрлехи заказчик службин директорӗ пулнӑ Сергей Варлашкина ӗҫрен кӑларнӑ.
Асӑннӑ организаци Чӑваш Енӗн Строительство, архитектура тата ҫурт-йӗрпе коммуналлӑ хуҫалӑх министерствине пӑхӑнать.
Сергей Варлашкина ӗҫрен кӑларасси ҫинчен калакан йышӑнӑва чӳк уйӑхӗн 11-мӗшӗнче алӑ пуснӑ.
Чӑваш Енӗн Строительство министерствине пӑхӑнса тӑракан «Чӑвашгаз» унитарлӑ предприяти директорӗ пулма Владимир Доброхотова шаннӑ. Ҫӗнӗ пукана вӑл ырантан, чӳк уйӑхӗн 1-мӗшӗнчен, йышӑнӗ.
Ҫав ҫын унччен те пысӑк должноҫсенче тимленӗ. «Ҫыхӑнура» форумра палӑртнӑ тӑрӑх, ытларах чухне — влаҫ органӗсенче. 2011 ҫулта вӑл пӗр вӑхӑт Шупашкар хула администрацийӗн пуҫлӑхӗн ЖКХ енӗпе ӗҫлекен ҫумӗ пулнӑ, 2011-2015 ҫулсенче – «Дорэкс» директорӗ, 2015 ҫулхи юпа уйӑхӗнчен пуҫласа 2016 ҫулхи ҫӗртме уйӑхӗччен республикӑн транспорт министрӗнче тӑрӑшнӑ, кайран — ял хуҫалӑх министрӗн ҫумӗнче, унтан —Чӑвашупрдор директорӗнче...
ЧР Экономика аталанӑвӗн министерстви «Советская Чувашия» хаҫат валли тӗп редактор шырама конкурс ирттерессине пӗлтернӗ. Документсене ӗнертен пуҫласа чӳк уйӑхӗн 14-мӗшӗччен йышӑнаҫҫӗ.
Кандидатсен аслӑ пӗлӳ, ертӳҫӗ должноҫӗнче е МИХсенче 5 ҫултан кая мар ӗҫленӗ опыт пулмалла. Вӗсен комисси пайташӗсене акционерлӑ обществӑн аталану программипе паллаштармалла.
Хаҫата 2013 ҫултанпа Владимир Васильев ертсе пынӑ.
Паян ЧР ҫутҫанталӑк министрӗн пӗрремӗш ҫумне ӗҫрен кӑларнӑ. Хушӑва ЧР Министрсен Кабинечӗн председателӗ Сергей Артамонов алӑ пуснӑ.
Елена Хомченко министрӑн пӗрремӗш ҫумӗнче 2021 ҫулхи нарӑс уйӑхӗнченпе ӗҫленӗ. Ҫапла вӑл ку должноҫра 4,5 ытла ҫул вӑй хунӑ. Министерствӑна киличчен Госохотрыбслужбӑра аслӑ инспекторта ӗҫленӗ, ваккат та пулнӑ.
Хальхи вӑхӑтра ҫутҫанталӑк министрӗн 3 ҫум юлнӑ: Елена Дымза, Татьяна Лукина тата Николай Охотин.
ЧР Элтеперӗ Олег Николаев Министрсен Кабинечӗн председателӗн тепӗр ҫумне палӑртнӑ. Ку должноҫе Олег Марков йышӑннӑ. Аса илтерер: суйлав хыҫҫӑн Олег Николаев ҫӗнӗ правительствӑра ҫавсенех, пӗринсӗр пуҫне, хӑварнӑ. Ун чухне вӑл Максим Иванова должноҫрен кӑларнӑ. Олег Марков ун вырӑнне йышӑннӑ. Вӑл Транспорт, Строительство, Ҫутҫанталӑк министерствисен тата Патшалӑх ҫурт-йӗр инспекцийӗн кураторӗ пулӗ.
Олег Марков унччен вице-премьер пулнӑ ӗнтӗ. Ку должноҫе вӑл Михаил Игнатьев Элтепер пулнӑ чухне йышӑннӑ. Ҫавӑн пекех Марков строительство министрӗ пулнӑ, анчах халӗ унӑн министр портфелӗ ҫук.
Чӑваш наци телерадиокомпанийӗ ҫулталӑк ҫурӑ ӗнтӗ директорсӑр ӗҫлет. Ун валли каллех ертӳҫӗ тупайман. Конкурс иккӗмӗш хут пулман.
ЧР Цифра министерстви ҫурла уйӑхӗнче конкурс ирттересси пирки пӗлтернӗ. Документсене авӑнӑн 11-мӗшӗччен йышӑннӑ, кайран тепӗр 2 эрнене тӑсӑлнӑ. Кун хыҫҫӑн комисси ларӑвӗ пулмалла пулнӑ. Анчах икӗ кандидатран пӗри заявкӑна каялла илнӗ.
Аса илтерер: 2024 ҫулхи ҫу уйӑхӗччен Алексей Гурьянов директор пулнӑ. Халӗ вӑл – ЧР цифра министрӗн ҫумӗ.
Паянтан Ҫӗрпӳ округӗн администрацийӗн пуҫлӑхӗн тивӗҫӗсене Юрий Константинов пурнӑҫлӗ. Ӑна унчченхи ертӳҫе тытса чарнӑ хыҫҫӑн ку должноҫе вӑхӑтлӑха лартнӑ.
Аса илтерер: Ҫӗрпӳ округӗн пуҫлӑхне Алексей Иванова иртнӗ эрнере тытса чарнӑ. Ӑна икӗ статьяпа айӑпласшӑн: услам ӗҫне саккуна пӑсса хутшӑннӑшӑн тата должноҫпе усӑ курнӑшӑн. Хальхи вӑхӑтра ӑна хупса усраҫҫӗ.
Юрий Константинов Ҫӗрпӳ тӑрӑхне Шупашкартан килнӗ. Вӑл 2024 ҫулхи ҫӗртме уйӑхӗнченпе Шупашкар хула администрацийӗн пуҫлӑхӗн ҫумӗнче, аппарат ертӳҫинче ӗҫленӗ.
-1.7 °C